Gusa iyi mibare igaragaza ko hakiri icyuho kuri ubu buvuzi ari nayo mpamvu Kaminuza zimwe zikomeje kongererwa ubushobozi mu buvuzi bw’iyi ndwara ku buryo hari abaganga bitegura gusoza.
Ibitaro bya Kaminuza bya Butare CHUB n’Ibitaro bya Butaro mu kuvura kanseri, nibyo bikomeje kongererwa ubushobozi nk’uko Dr Maniragaba Theoneste ushinzwe Ishami ryo kurwanya Kanseri mu Kigo cy’Igihugu cy’Ubuzima, RBC, avuga.
Ubushakashatsi bugaragaza ko hatagize igikorwa imibare yerekana ko ubwiyongere bw’impfu zitewe na kanseri buzava kuri 520348 muri 2020 zikagera ku bantu bagera kuri miliyoni imwe mu mwaka wa 2030 mu bihugu byo munsi y’ubutayu bwa Sahara.
Mu 2022 mu Rwanda hagaragaye abarwayi ba kanseri barenga ibihumbi bitanu, muri aba abagera kuri 500 bari bafite kanseri y’ibere, 500 iy’inkondo y’umura, aba prostate bari hagati ya 300-400.
Imibare kandi igaragaza ko mu mwaka wa 2020, abagera kuri miliyoni 19.3 ari bo barwaye Kanseri ku Isi yose.
Mu 2020 kandi kanseri yahitanye abagera kuri miliyoni 9.96 nk’uko bigaragazwa n’Ishami ry’Umuryango w’Abibumbye ryita ku Buzima, OMS.
