Kugeza ku wa Mbere nijoro, umuryango wa Sandra Muhoza wari utarabona uburyo bwo kumubona.
“Dufite ubwoba kandi duhangayikishijwe cyane n’umutekano we. Twamenye ko yakorewe iyicarubozo kuva yatabwa muri yombi. Byongeye kandi, arwaye indwara idakira. Dufite ubwoba ko ubuzima bwe bushobora kumera nabi ”, nk’uko abavandimwe be baganiriye n’abanyamakuru ba SOS Médias Burundi babitangaje.
Nk’uko amakuru aturuka i Ngozi avuga ngo Sandra Muhoza yimuriwe ku wa Mbere mu murwa mukuru w’ubukungu, Bujumbura, aho icyicaro cya SNR giherereye.
Umwe mu bo SOS Médias Burundi ikesha amakuru yagize ati “Yagombaga kwerekwa abanyamakuru kugira ngo ahakane amakuru ajyanye no gukwirakwiza imihoro yatangaje nk’uko abayobozi b’u Burundi bavuga.”
Nta tangazo ryigeze rivuga ku iyimurwa ry’uyu munyamakuru i Bujumbura. Ariko ku Cyumweru, komiseri wa polisi mu Ntara ya Ngozi, Beaufort Ndoreraho, yemereye Radio Isanganiro ko “polisi ari yo ifite Sandra Muhoza”.
Abapolisi benshi bemeje ko yimuriwe muri kasho y’ubutasi ariko nta yandi makuru arambuye.
Nk’uko umunyamakuru waho abitangaza, ngo Sandra Muhoza yanditse mu itsinda rya WhatsApp ati “gukwirakwiza imihoro bibera na hano iwacu”.
