Ubwo iyi ndege yahagagurukaga i Birmingham yerekeza i Belfast, umupilote wayo yaje gucyeka ko harimo ikintu gishobora guhungabanya umutekano w’abagenzi maze ahita ayisubiza ku kibuga cy’indege igitaraganya.
Ubwo indege yagarukaga ku kibuga cy’indege cya Birmingham, abashinzwe gutegurura ibisasu bahise baza kureba niba cyaba ari igisasu nk’uko byari byaketswe, ni nako iki kibuga cy’indege cyahise gihagarikwa by’agateganyo nk’uko bitangazwa na Daily Mail.
Itsinda rishinzwe gutegurura ibisasu ryahise rihagera ryitwaje imodoka enye zuzuyemo ibikoresho ndetse bazanye na polisi iri kumwe n’imbwa zisaka ibisasu.
Abagenzi bari hagati ya 72-76 bari muri iyi ndege bagaragaye bumiwe nyuma yo gukurwa mu ndege igiye gusakwa.
Nyuma yo gusaka iyi ndege, ubuyobozi bw’indege bwatangaje ko icyabonwe mu ndege cyitari guhungabanya umutekano w’abaturage. Icyasanzwe mu ndege ntabwo cyatangajwe mu itangazamakuru.
Ibi byabaye kuri iki kibuga cy’indege byatumye izindi ndege zitinda guhaguruka ibintu abagenzi batishimiye.
