Cristiano Ronaldo yashyizeho agahigo gashya ko gutsinda ibitego byinshi mu mwaka umwe wa Shampiyona ya Arabie Saoudite aho yatsinze bibiri mu mukino wa Al-Nassr na Al-Ittihad, ageza ibitego 35.
Ronaldo w’imyaka 39, yatsinze ibitego bibiri muri 4-2 ikipe ye yatsinzemo uyu mukino, atambuka ku gahigo kari kashyizweho na Abderrazak Hamdallah watsinze ibitego 34 mu mwaka w’imikino wa 2018/19.
Cristiano amaze gutsinda ibitego 64 mu mikino 69 yakiniyemo Al-Nassr mu marushanwa yose kuva ayigezemo avuye muri Manchester United muri Mutarama 2023.
Ronaldo amaze gutsinda ibitego 765 mu myaka 22 yakiniyemo amakipe ya Sporting Lisbon, Manchester United, Real Madrid na Juventus.
Ni we kandi ufite agahigo ko gutsinda ibitego byinshi mu mikino mpuzamahanga aho yatsindiye Portugal ibitego 128 mu mikino 206 amaze kuyikinira.
