APR FC ikomeje ibiganiro n’abatoza batandukanye yifuza gusimbuza Umufaransa Thierry Froger wasoje amasezerano ye muri iyi kipe
Ikipe y’Ingabo iri gukora iyo bwabaga kugira ngo ikemure iki kibazo mbere yo gutangira gushaka n’abakinnyi izongeramo mu rwego rwo kwitegura umwaka w’imikino mushya.
Aritz López Garai ni umwe mu batoza bari ku rutonde rw’abo APR FC iri kuganiriza ndetse n’ibiganiro bigeze kure hamwe n’abamuhagarariye.
López Garai ni umugabo w’imyaka 44 wavukiye muri Barakaldo muri Espagne yabaye umukinnyi ariko ntiyageze ku rwego ruhambaye, yatangiye umwuga w’ubutoza mu 2017, aho yakunze gutoza mu makipe yo mu cyiciro cya kabiri muri Espagne.
uyu mugabo aheruka guhesha Igikombe cya Shampiyona FC Nouadhibou yo muri Mauritanie bivuze ko atari mushya ku Mugabane wa Afurika.
Julien Chevalier ni irindi zina riri ku rutonde rw’abatoza bifuzwa na APR FC.
Ni umugabo utarahiriwe n’umwuga wo gukina umupira w’amaguru kuko atageze mu makipe akomeye cyane kugeza mu 2011 asezeye gukina nk’uwabigize umwuga.
Kuva mu 2011 kugeza mu 2014, Chevalier yari ashinzwe abagura abakinnyi mu mashuri y’abato ya ASEC Mimosa. Muri uwo mwaka, yazamuwe mu ntera aho kugeza mu 2017 yagizwe umuyobozi w’amakipe y’abato ya ASEC Mimosa.
Mu 2017, Chevalier yagizwe umutoza wungirije w’Ikipe y’Igihugu ya Togo aho yabaye imyaka ibiri kugeza mu 2019. yabaye umutoza w’ikipe nkuru ya ASEC Mimosa ikina mu Cyiciro cya Mbere muri Côte d’Ivoire. Kugeza ubu, amaze kwegukana Igikombe cya Shampiyona inshuro eshatu (2021,2022 na 2023)
Adel Amrouche ni umwe mu mazina akomeye ari ku rutonde rw’abatoza APR FC.
Uyu mutoza w’imyaka 56 ni umwe mu babimazemo igihe kinini ariko wakunze kuba mu makipe y’ibihugu. Amrouche yatangiye umwuga w’ubutoza mu 1988.
Yageze ku Mugabane wa Afurika mu 2002 ubwo yatozaga Daring Club Motema Pembe yo muri Repubulika Iharanira Demokarasi ya Congo. Mu 2007 yerekeje mu Ikipe y’Igihugu y’u Burundi yamazemo imyaka itanu.
Mu makipe asanzwe yanyuze muri MC Alger na USM Alger z’iwabo muri Algérie ikipe y’Igihugu ya Kenya, Libya, Botswana, Yemen na Tanzania aherukamo .
APR FC biteganyijwe ko izabanza kubona umutoza mbere yo kujya ku isoko ryo kugura abakinnyi mu rwego rwo kwitegura imikino ya CAF Champions League na Shampiyona iteganyijwe gutangira tariki 10 Kanama 2024.
