yiseguye ku bagenzi bayo bajya mu Bwongereza

Sosiyete y’Ubwikorezi bwo mu Kirere, RwandAir yiseguye ku bagenzi bayo bagana mu Mujyi wa Londres mu Bwongereza kubera imyigaragambyo iteganyijwe muri icyo gihugu.

Mu butumwa iyi sosiyete yanyujije ku rukuta rwayo rwa X yagize ati “Bitewe n’imyigaragambyo y’abakozi bagenzura abinjira n’abasohoka mu Bwongereza iteganyijwe ku itariki 31 Gicurasi kugeza ku itariki 2 Kamena, turasaba abagenzi bose berekeza ku Kibuga cy’Indege cya Heathrow i Londres kwihanganira kumara umwanya munini ahagenzurirwa abinjira n’abasohoka nyuma yo kuva mu ndege”.

Iyi myigaragambyo izitabirwa n’abakozi bagera kuri 500 batangaga serivise z’abinjira n’abasohoka ku Kibuga cy’Indege cya Heathrow, kubera kutumvikana na Leta ku mategeko agenga akazi n’ibiruhuko by’umukozi.

Ni mu gihe Leta y’u Bwongereza yo ivuga ko yatunguwe n’icyemezo cy’iryo shyirahamwe cyo gufasha aba bakozi kwigaragambya, igasaba ko byakorwa mu biganiro.

Sosiyete RwandAir isanzwe ikora ingendo enye mu cyumweru zerekeza mu Bwongereza.