Umutaliyani Enzo Maresca w’imyaka 44 yagizwe Umutoza wa Chelsea mu gihe cy’imyaka itanu ishobora kongerwaho umwe.
Uyu mugabo yahize abandi bari ku rutonde nka Roberto de Zerbi watozaga Brighton & Hove Albion, Kieran McKenna wa Ipswich Town na Thomas Frank wa Brentford bari bahanganiye uyu mwanya.
Maresca yatangiye gutoza mu 2020 ubwo yari ashinzwe amakipe y’abato ya Manchester City. Mu 2021 yerekeje muri Parma yo mu Butaliyani yamazemo imyaka ibiri, mu 2023 yerekeje muri Leicester City ayifasha kwegukana Igikombe cya Shampiyona y’Icyiciro cya Kabiri mu Bwongereza.
Enzo Maresca yabaye umutoza wa gatandatu mu myaka itanu ishize, aho by’umwihariko ari uwa kane kuva Todd Boehly yagura Chelsea muri Gicurasi 2022.
The Blues yagize umwaka mubi gusa iza kuwusoza neza itsinda imikino itanu ya Shampiyona y’u Bwongereza bityo isoza ku mwanya wa gatandatu biyihesha kuzakina irushanwa rya UEFA Conference League.
