Perezida wa Leta Zunze Ubumwe za Amerika, Joe Biden, na Donald Trump yasimbuye ku butegetsi, bahuriye mu kiganiro mpaka kibanziriza amatora y’Umukuru w’Igihugu ateganyijwe mu Ugushyingo 2024, buri wese agaragaza impamvu yo gushyigikirwa n’abaturage.
Biden winjiye mbere mu cyumba cy’ikiganiro, yavuze ko ubwo yajyaga ku butegetsi mu 2021, yasanze Trump yarahungabanyije ubukungu bwa Amerika.
Trump yasubije ko mu gihe yari ku butegetsi, Amerika yibasiwe cyane n’icyorezo cya Covid-19 ariko ko muri iki gihe, ubukungu bw’igihugu cyabo bwongeye kuzanzamuka, nyuma yo gushoramo amafaranga menshi.
Biden yateguje ko niyongera gutorwa, azazamura imisoro abatunze za miliyari bazajya batanga kugira ngo imufashe guteza imbere gahunda z’ubuvuzi buhabwa abana ndetse n’abaturafe muri rusange.
Trump yanenze politiki ya Biden yo guha ikaza abimukira bose barimo n’abadafite ibyangombwa, agaragaza ko bazahungabanya imibereho y’Abanyamerika.
Yakomeje ati “Hari abagore bato benshi bishwe n’aba bantu yemerera kwambuka umupaka. Aba bicanyi bari kuza mu gihugu cyacu, bagasambanya abagore bacu, bakanabica. Bari kuba muri hoteli zihenze muri New York City n’ahandi hantu.”
Trump kandi yanenze uburyo Biden yakuye ingabo za Amerika muri Afghanistan, agaragaza ko bwahaye rugari u Burusiya, bujya gushoza intambara muri Ukraine, Yavuze ko iyo aba ari ku butegetsi, iyi ntambara yatangiye muri Gashyantare 2022 itari kubaho.
Biden yasubije Trump ko byagenda kose, Perezida Vladimir Putin ari umugizi wa nabi, kandi ko icyo agamije ari ugufata Ukraine n’ibindi bihugu, kuri Israel, Biden yibukije Trump ko aherutse kugaragaza uburyo intambara y’iki gihugu n’umutwe wa Hamas yahagarara kandi ngo Minisitiri w’Intebe wa Israel, Benjamin Netanyahu yarabwemeye.
Trump yasubije Biden ko ahubwo Netanyahu ari we ushaka gukomeza intambara kuri Hamas, icyakoze ahamya ko Minisitiri w’Intebe wa Israel akwiye kwemererwa gukomeza kotsa igitutu uyu mutwe.
Biden yagaragaje ko Trump ari ikibazo kuri demokarasi ya Amerika, abishingiye ku myigaragambyo abashyigikiye Trump bakoreye ku ngoro y’Inteko Ishinga Amategeko muri Mutarama 2021, bamagana ibyavuye mu matora.
Trump yavuze ko Biden akwiye gukurikiranwaho icyaha gikomeye mu gihe yazava ku butegetsi. Undi yasubije ko adashobora gukandamiza abo bahanganye muri politiki, yifashishishije inzego z’igihugu.
