Uwamariya Noella w’imyaka 35 wo mu karere ka Rusizi, wabyaye avuye kwamamaza, Paul Kagame, chairman w’Umuryango RPF-Inkotanyi akaba n’umukandida ku mwanya w’umukuru w’igihugu, avuga ko urukundo amukunda arirwo rwatumye ajya kumwamamaza nubwo yari abizi ko igihe cyo kubyara cyegereje.
Byabaye tariki 28 Kamena 2024 umunsi, Paul Kagame yiyamamarije kuri site yo mu karere ka Rusizi.
Uwamariya wari mu bihumbi by’abaturage bitabiriye iki gikorwa, akiva kuri site yahise afatwa n’ibise hitabazwa imbangukiragutara, imugeza ku bitaro bya Gihundwe ari naho yabyariye umwana w’umukobwa, ibi byishimo byahuriranye n’urukundo rudasanzwe akunda Paul Kagame. Umwana we yamwise, Irarinda Ange Jeannine.
Uyu mubyeyi agize abana 5. Nubwo ashima byinshi byagezweho mu buryo rusange, giti cye asaba ubuyobozi bw’akarere ka Rusizi ko bwamufasha akabona aho kuba kuko inzu atuyemo itameze neza.
Umujyanama w’ubuzima, Uzayisenga Christine wakurikiranye uyu mubyeyi kuva agisama avuga ko kugeza ubu umwana na nyina bameze neza, gusa ngo nta cyizere bafite ko uyu mwana azakomeza kumera neza, bitewe n’ubuzima abayemo butari bwiza.
Uwamariya abaye umubyeyi wa kabiri ubyaye yitabiriye igikorwa cyo kwamamaza Paul Kagame, nyuma w’umubyeyi w’i Muhanga wabyaye agiye kwamamaza uyu mukandida.
