Abarwanyi bo mu mitwe yitwaje intwaro muri Repubulika Iharanira Demokarasi ya Congo, bishe abashinwa bagera kuri 6 mu ntara ya Ituri.
Umuyobozi wa Djugu, Ruphin Mapela, ari naho ibyo byabereye, yavuze ko byakozwe n’umutwe witwa CODECO. Igizwe ahanini n’abarwanyi bo mu bwoko bwa Lendu, bavuga ko barengera abakandamijwe.
Umuvugizi w’ingabo muri kariya karere,yemeje ayo makuru yongeraho ko abandi barwanyi batandatu b’uwo mutwe witwaje intwaro nabo bahasize ubuzima.
I Beijing mu Bushinwa , minisiteri y’Ububanyi n’amahanga y’Ubushinwa yamaganye icyo igitero, ivuga ko atari ubwa mbere abaturage b’u Bushinwa baba muri Congo bibasirwa bakanicwa.
Umuvugizi w’iyi minisiteri, Mao Ning, yabwiye abanyamakuru ko Ubushinwa buri kuvugana n’ubuyobozi bwa DRC mu gushakisha abandi baburiwe irengero.
