Umutwe witwaje intwaro wa M23 n’ingabo za Repubulika Iharanira Demokarasi ya Congo byemeye agahenge k’ibyumweru bibiri kasabwe na Leta Zunze Ubumwe za Amerika.
Ibiro bya Perezida wa Amerika, Joe Biden, byatangaje ko aka gahenge gatangira kuri uyu wa 5 Nyakanga kakazarangira ku ya 19 Nyakanga 2024.
Byasobanuye ko ikigamijwe ari ukugira ngo M23 n’ingabo za RDC zihagarike imirwano, abaturage bahunze basubire mu ngo ku bushake bwabo, abashinzwe ubutabazi babagereho bitagoranye.
Amerika yatangaje ko aka gahenge kagezweho gashingiye ku ruzinduko Umuyobozi w’urwego rushinzwe ubutasi, Avril Haines, yagiriye mu Rwanda na RDC mu Ugushyingo 2023; aho yaganiriye na Perezida Paul Kagame na Félix Tshisekedi.
Aka gahenge gatangajwe nyuma y’aho M23 ifashe agace ka Kanyabayonga muri teritwari ya Lubero, kiyongera ku tundi twinshi yafashe mu ntara ya Kivu y’Amajyaruguru. Si ubwa mbere, impande zombi zikemereye Amerika kuko no mu mpera za 2023 byarabaye ariko ntikubahirijwe.
