Guverinoma ya Uganda yemeje ko imaze kwishyura iya Repubulika Iharanira Demokarasi ya Congo indishyi ya miliyoni 195 z’amadolari ya Amerika (miliyari 255,2 Frw), ifitanye isano n’ibyaha ingabo zayo zakoreye muri Teritwari ya Ituri.
Aya makuru yemejwe n’Umunyamabanga Uhoraho wa Leta ya Uganda muri Minisiteri y’Igenamigambi akaba n’Umunyamabanga w’Ikigega cy’Igihugu, Ramathan Ggoobi.
RDC mu 1999 yajyanye Uganda mu Rukiko rw’Umuryango w’Abibumbye, ICJ, ishinja Ingabo zayo ibyaha birimo gusahura umutungo kamere, kwangiza umutungo no guhohotera ikiremwamuntu.
Abanyamategeko bari bahagarariye iki gihugu basabaga ko Uganda itanga indishyi ya miliyari 11 z’amadolari ariko yo yagaragaje ko idafite ubushobozi bwo kuyishyura, isaba koroherezwa.
Mu 2022, ICJ yategetse Uganda kwishyura RDC indishyi ya miliyoni 325 z’amadolari, buri mwaka w’ingengo y’imari yemererwa kujya yishyura miliyoni 65 kugeza mu 2026.
Ggoobi yagize ati “Tumaze kwishyura RDC miliyoni 195 z’amadolari muri miliyoni 325$. Asigaye ni miliyoni 130 z’amadolari tuzishyura mu wundi mwaka.”
Ingabo za Uganda zabaye muri RDC kuva mu 1998 kugeza mu 2003. Zari zaragiye kwifatanya n’umutwe witwaje intwaro wa MLC mu rugamba rwo gukuraho ubutegetsi bwa Laurent-Désiré Kabila.
