Umunya-Slovenia Tadej Pogačar yegukanye isiganwa rya Tour de France nyuma yo gusoza uduce twose twaryo ari we uyoboye bagenzi be abarusha iminota itandatu n’amasegonda 17.
Agace ka 21 ka Tour de France ari na ko ka nyuma muri uyu mwaka, kakinwe kuri iki Cyumweru, tariki ya 21 Nyakanga 2024, kabera mu mihanda ya Monaco na Nice, aho abakinnyi bakinaga gusiganwa n’igihe buri muntu ku giti cye (Individual Time Trial-ITT).
Mu bakinnyi 120 bakinnye kuri uyu munsi, Tadej Pogačar ni we wabahize kuko yakoresheje iminota 45 n’amasegonda 24 ku ntera yareshyaga n’ibilometero 33,7.
Kubera kwegukana uduce dutandatu twose muri Tour de France, yakuyeho agahigo kaherukaga kubaho mu 1948, ubwo Umutaliyani Gino Bartali yakuragamo dutanu.
Muri rusange Tadej Pogačar afatwa nk’umukinnyi wa gatandatu ukomeye muri iri siganwa kuko amaze kwambara umwenda w’umuhondo inshuro 40 ndetse ikaba ari iya gatatu atwaye iri rushanwa nyuma ya 2020 na 2021.
Nubwo Pogačar yatwaye isiganwa, yatakaje amanota y’ahazamuka ku rutonde rusange kuko yasimbuweho na Richard Antonio Carapaz ukinira EF Education–EasyPost.
