Ikigo gikora ibikoresho by’ikoranabuhanga byifashishwa mu buvuzi bw’amaso, Topcon Healthcare, cyatangaje ko i Kigali hamaze kugezwa camera z’ubwoko bwa NW400 n’iza NW500 zifashishwa gufata amafoto y’amaso, mu gupima abarwayi bafite diabète ishobora gutera ubuhumyi.
Amafoto yafashwe n’izi camera, ahita yoherezwa ku ikoranabuhanga ry’ubwenge bukorano ry’iki kigo rizwi nka Cybersight AI, rifasha mu gukora ubusesenguzi mu gihe gito cyane ku buryo rizajya rihita rigaragaza ibimenyetso by’indwara zisanzwe z’amaso zirimo na ‘diabetic retinopathy’ mu masegonda make cyane.
Si ibyo gusa kuko Topcon Healthcare, yamaze gutangaza ko yahuje imbaraga n’Umuryango mpuzamahanga ugena gahunda zinyuranye zo kwita ku maso, Orbis International, mu gufatanya n’Ishuri Mpuzamahanga ryigisha Ubuvuzi bw’Amaso rya Rwanda International Institute of Ophthalmology [RIIO], mu guteza imbere ikoranabuhanga ryifashishwa mu gupima amasomo aterwa na diabète mu Rwanda.
Umujyanama mu by’ubuvuzi akaba n’Umuyobozi wa RIIO, Ciku Mathenge, yavuze ko izi camera n’ubu bufatanye bizatanga umusanzu mu gutahura kare uburwayi bw’amaso buterwa na diabète, bigafasha mu gukumira ubuhumyi bwa burundu bushobora guterwa n’iyi ndwara.
Ati “Twishimiye gufatanya na Topcon, bizatuma gupima indwara z’amaso birushaho koroha mu Mujyi wa Kigali. Turabashimira k’ubw’ubuntu bwabo n’ubushake mu kongera uburyo bwo kwita ku maso ku Isi.”
Umuyobozi ushinzwe ubucuruzi muri Topcon Europe Medical, Peter van der Ree, yavuze ko banyuzwe no kwinjira muri ubu bufatanye, kandi ko bwitezweho kuzatanga umusanzu ugaragarira buri wese, urimo no gutahura indwara kare no kuzivura byumwihariko iya ‘diabetic retinopathy’.”
