Uruganda rukora moto zikoresha umuriro w’amashanyarazi rwa Spiro Rwanda, rukomeje kwishimira umusanzu ruri gutanga mu kugabanya imyuka yangiza ikirere, by’umwihariko mu Rwanda.
Mu cyumweru gishize uru ruganda rwari rahurije hamwe abamotari 150 mu rwego rwo kwishimira iyi ntambwe, aho bose bakoze ikimeze nk’akarasisi mu mihanda y’i Kigali, hagamijwe kumurika moto nshya z’amashanyarazi no kugaragaza ibyiza byazo mu kurwanya ihindagurika ry’ikirere.
Iki gikorwa cyatangiriye ku cyicaro cya Spiro i Masoro, ahatangiwe moto z’amashanyarazi zigera kuri 500, ibyatumye umubare w’izimaze kugezwa mu Rwanda ugera kuri moto 1,000.
Aka karasisi katangijwe n’abakozi ba Spiro Atete Benigne na Akimanimpaye Odile.
Umuyobozi mukuru wa Spiro, Kaushik Burman, yavuze ko “Iki gikorwa ni igihamya cy’ubwiyongere bw’abashyigikiye gahunda yo gutwara abantu binyuze mu buryo burambye butangiza ikirere. Twishimiye guhuriza hamwe abamotari 150 dusangiye icyifuzo cyo kugira ejo hazaza hasukuye kandi heza”.
Imiterere y’u Rwanda irihariye, dore ko runitwa igihugu cy’imisozi igihumbi. Akenshi usanga abakora umwuga wo gutwara abantu bagorwa n’imihanda myinshi ihanamye, ariko moto z’amashanyarazi za Spiro, zigira moteri iri hagati y’amahembe n’aho motari yicara, bikoroha kuyitwara.
Gushyira moteri hagati na hagati kuri moto, bituma uburemere buringanira, bigatuma igenda neza kandi bikayorohera kuzamuka imihanda ihanamye. Ibyo bituma abamotari bashobora kunyura ahantu hari imisozi mu buryo buboroheye.
Kuri ubu mu bihugu bya Bénin, Togo, u Rwanda na Kenya, habarizwa moto za Spiro 18,000 na batiri 40,000 ziri gukoreshwa.
Batiri z’izi moto zimaze guhindurwa inshuro 10.5 million, binyuze muri sitasiyo zirenga 600 ziri hirya no hino. Muri rusange izi moto zimaze gukora ingendo zingana n’ibilometero birenga miliyoni 500, mu buryo butangiza ikirere.
