Umupilote yapfuye nyuma y’uko kajugujugu yari atwaye iguye ku gisenge cya hotel iri mu mujyi wa Cairns uherereye mu majyaruguru ya Queensland muri Australia .
Iyi ndege ya kajugujugu yagonze DoubleTree by Hilton Hotel ahagana mu masaha ya saa 01h50 za mu gitondo ku wa Mbere (16: 50B Ku Cyumweru), itera inkongi y’umuriro ndetse bituma abashyitsi babarirwa mu magana basohoka.
Abayobozi bavuga ko umwe gusa wari utwaye kajugujugu yapfiriye aho, maze abashyitsi ba hotel babiri, umugabo uri mu kigero cy’imyaka 80 n’umugore uri mu kigero cy’imyaka 70, bajyanwa mu bitaro bameze neza nk’uko iyi nkuru dukesha BBC ivuga.
Polisi ya Queensland hamwe n’ishami rishinzwe umutekano w’indege barimo gukora iperereza ku byerekeranye n’impanuka, mu gihe isosiyete ikurikirana iby’ingendo za kajugujugu ivuga ko yari mu rugendo “rutemewe”.
