Umuhanzi Eddy Kenzo, uherutse kugirwa umujyanama wa Perezinda Yoweri Kaguta Museveni mu bijyanye n’ubuhanzi n’ubugeni, yamushimiye ku bushishozi agira butuma ashobora kubona ubushobozi mu bantu baciriritse.
Yabigarutseho mu kiganiro yagiranye n’itangazamakuru cyagarukaga ku rugendo rwe mu muziki, avuga ko rwaranzwe no kwigomwa.
Ati: “Mu rugendo rwanjye, nirinze ibintu byinshi, none amaherezo ukwigomwa n’imvune zanjye bitanze umusaruro. Abantu bahora bibaza uburyo umuhanzi ashobora gushyingiranwa na Minisitiri ariko bakirengagiza ko hari ibyo nigomwe byagombaga gutuma ambonamo umuntu udakwiye, byansabye kwirinda gukoresha ibiyobyabwenge, kunywa inzoga, gutukana no guhangana, kwikinisha n’izindi ngeso mbi.”
Yongeyeho ati: “Nagenze gake, nemera kwigishwa n’ubuzima, nshaka ubumenyi bw’ingenzi, kugeza aho nshobora kwemeza umuntu ufite amateka meza ko muri njye harimo iby’agaciro. Abantu bagomba kureba amateka yanjye n’urugendo nanyuzemo ariko ntibanyitiranye nabyo”.
Eddy Kenzo abona Perezida yavuze ko Museveni ayoborana ubuhanga bukomeye kuko ashobora kubona ubushobozi mu bantu baciriritse aho abandi babona ko ntacyo bashoboye.
Ati: “Ndashimira Perezida kuba yarakoresheje ubuhanga mu kuyobora iki gihugu, kuko iyo urebye uko abantu batubona, urubyiruko rwo muri Ghetto, ntibatubonamo ubushobozi ndetse babona nta gaciro tugira, ndashimira Umukuru w’Igihugu ubona agaciro mu bantu bakomoka mu miryango iciriritse kandi akabasha kumenya impano zitandukanye zishobora kumufasha kuyobora Igihugu.”
Kenzo yizera ko umuhate we mu guhuriza hamwe ibihangano byo mu mpande zose z’Igihugu nka Perezida w’Ihuriro ry’Abahanzi muri Uganda (UNMF), byagize uruhare runini mu kugirirwa icyizere na Perezida Museveni.
Kenzo avuga ko umwanya yahawe ari amahirwe yo kugaragaza no gukemura ibibazo bimaze igihe biri mu buhanzi, no mu buzima bw’abakiri bato, ibyo abona nk’inzira izabafasha kureka inzira y’imyigaragambyo ahubwo bagafatanya guha umurongo ibyifuzo byabo.
Anasaba abahanzi bagenzi kumuba hafi bakamuha ibitekerezo kugira ngo babashe gukemura ibyo bibazo, aho kugira ngo bate umwanya bibaza ku bushobozi bwe ndetse n’icyo azakora, ahubwo bareka ibikorwa bikazavuga.
Ku wa Gatatu tariki 21 Kanama 2024, ni bwo Perezida wa Uganda, Yoweri Kaguta Museveni, yagize Eddy Kenzo Umujyanama we mu bijyanye n’ubuhanzi n’ubugeni.
