Mu gitondo cyo kuri uyu wa Gatatu tariki 11 Nzeri 2024 abagenzi bari ku kibuga cy’indege gikuru cya Kenya kiri mu murwa mukuru wa Nairobi babuze uko bagenda kubera imyigaragambyo y’abakozi yamagana ko leta ya Kenya igiye kugikodesha na kompanyi yo mu Buhinde.
Kuva saa sita z’ijoro ryacyeye indege nyinshi zari kugenda zasubitse ingendo, ndetse n’abakozi bakora kuri iki kibuga bahagarika imirimo yabo.
Mu gitondo cyo kuri uyu wa gatatu abakozi benshi bakora ku kibuga cya cy’indege cya Jomo Kenyatta International Airport (JKIA) bagaragaye bigaragambya ku marembo makuru ya cyo ndetse abapolisi bagerageza guhosha iyo myigaragambyo.
Abakora imyigaragambyo bavuze ko batari buyihagarike Leta ya Kenya idahagaritse amasezerano yagiranye na Adani Group yo kugura iki kibuga adahagaritswe.
Ihuriro ry’abakozi bakora ku kibuga cy’indege cya Kenya (JKIA) ari nabo bakoze imyigaragambyo bavuga ko gukodesha iyo kompanyi yigenga iki kibuga imyaka 30 bivuze gutakaza akazi kuri benshi muri bo.
Abigaragambya ngo nibatamenya amakuru yose agize amasezerano yo gukodesha iki kibuga cy’indege na kompanyi y’abahinde izwi nka Adani Group badateganya kuyihagarika.
Kuva iyi myigaragambyo yatangira Kompanyi ya leta Kenya Airways, yasohoye itangazo rivuga ko habayeho guhagarika ingendo zimwe zayo zari ziteganyijwe ku bagenzi bahahagurukira n’abagomba kuhagera.
Perezida William Ruto wa Kenya yasobanuye ko leta itagiye kugurisha iki kibuga, ahubwo igiye kugikodesha n’abikorera kugira ngo bagiteze imbere.
Iyi myigaragambyo ibaye nyuma y’uko ku wa kabiri Urukiko Rukuru rwa Kenya ruhagaritse by’agateganyo ayo masezerano yo gukodesha iki kibuga.
