Minisitiri w’Umutekano w’Imbere muri Venezuela, Diosdado Cabello, yatangaje ko abashinzwe umutekano baburijemo umugambi wa Leta Zunze Ubumwe za Amerika wo kwica Perezida Nicolas Maduro.
Uyu muyobozi yabwiye abanyamakuru ko uyu mugambi wagombaga gushyirwa mu bikorwa n’abafatawe muri yombi barimo Abanyamerika batatu, babiri bakomoka muri Espagne n’umwe ukomoka muri Repubulika ya Czech.
Minisitiri Cabello yasobanuye ko aba Banyamerika na bagenzi babo bafatanywe imbunda 400 kandi ko bayobowe n’uwitwa Wilbert Castaneda wabaye mu ngabo za Amerika zirwanira mu mazi, Navy Seal.
Yasobanuye ko Castaneda wafashwe tariki ya 1 Nzeri 2024 ari umurwanyi ufite ubunararibonye, kuko ni umwe mu basirikare ba Amerika bakoreye muri Iraq na Afghanistan.
Minisitiri Cabello yatangaje ko Castaneda na bagenzi be batari bagambiriye kwica Perezida Maduro gusa, ahubwo ko Visi Perezida na we yari ku rutonde rw’abicwa.
Yagaragaje ko Espagne na yo yari ifite uruhare muri uyu mugambi, asobanura ko babiri bafite ubwenegihugu bwayo bakoranaga n’urwego rwayo rushinzwe ubutasi, gusa yabihakanye.
Yagize ati “Turagira ngo Isi imenye ko Venezuela yatewe. Espagne ibifitemo uruhare kandi Amerika ni yo iyobora iki gikorwa.”
Umuvugizi w’ibiro bya Amerika bishinzwe ububanyi n’amahanga, Matthew Miller, yemeje ko mu Banyamerika bafashwe harimo uwari ukiri umusirikare, ariko ahakana umugambi Leta ya Venezuela ishinja igihugu cyabo.
Venezuela yatangiye gushinja Amerika gushaka kwica Perezida Maduro nyuma yo kwegukana intsinzi y’amajwi 52% mu matora yabaye muri Nyakanga 2024. Ni intsinzi Amerika yamaganye.
