Undi mukinnyi wa Real Madrid yagize imvune izatuma amara amezi atatu hanze y’ikibuga, wiyongereye ku bandi bayo bavunitse, mu gihe ifite imikino ikomeye mu bihe biri imbere irimo n’iya UEFA Champions League inafitiye igikombe.
Umukinnyi Brahim Diaz ukina asatira wa Real Madrid, yagize ikibazo cy’imvune mu mukino wahuzaga iyi kipe na Real Sociedad, warangiye Real Madrid inawutsinzemo ibitego 2-0.
Brahim Diaz wari wagiriwe amahirwe yo kubanza mu kibuga, yasohotse nyuma y’imvune yo kweguka kw’inyama yo ku kibero, aho ibizamini by’abaganga byemeje ko agomba kumara hanze amezi atatu.
Brahim Diaz aje yiyongera ku bandi bakinnyi ba Real Madrid bavunitse barimo David Alaba, Edourdo Camavinga, Dani Ceballos, Aurelien Tchoumeni ndetse na Jude Bellingham, bose basanzwe babanzamo banafasha iyi kipe mu mikino yayo.
Umutoza wa Real Madrid, Carlo Ancelotti yatangaje ko Real Madrid iri mu bihe bikomeye by’imvune zikabije, ariko ko biteguye gukoresha abakinnyi bafite ndetse bitazaba urwitwazo rwo kubura intsinzi mu mikino iri imbere yaba iya Shampiyona ndetse n’iya UEFA Champions League.
