Muri Repubulika Iharanira Demokarasi ya Congo, ku cyumweru imfungwa zirenga 1,600 zararekuwe ziva muri gereza ya Makala i Kinshasa kubera impamvu z’uburwayi budasanzwe.
Minisitiri w’ubutabera Constant Mutamba wari ukuriye iki gikorwa, yumvikanye anenga gereza gufunga abantu barwaye mu buryo bukomeye kandi batavurwa bikwiriye.
Amashusho yagaragaje bamwe mu barekuwe batabasha kugenda kubera ibisebe bikabije bafite ku maguru ndetse n’intege nke.
Gereza ya Makala ni yo ifungiyemo abantu benshi muri DR Congo, yubatswe igenewe gufunga abantu 1,500 ariko bivugwa ko irimo abarenga 15,000, nk’uko imiryango itegamiye kuri leta ibivuga.
Bamwe mu baharanira uburenganzira bwa muntu banenga uburyo abantu bamwe bafungwa muri za gereza muri DR Congo bakamara imyaka bataraburanishwa.
Minisitiri Constant Mutamba yumvikanye abwira abarekuwe ko mu gihe bakwitwara nabi bageze hanze bazahita bongera bagafungwa.
Kurekura izi imfungwa, bikurikiye kugerageza gutoroka gereza kwiciwemo imfungwa 129 ku mibare yatanzwe na leta.
