Rutahizamu wa Real Madrid ukina anyuze mu mpande, Vinícius Júnior, yashimangiye ko nta kabuza abizi neza ko ari we uzegukana igihembo kiruta ibindi muri ruhago cya Ballon d’Or.
Ibi ni bimwe mu byo uyu mukinnyi yatangaje agaragaza amahirwe afite yo kuba ari we mukinnyi wakwegukana Ballon d’Or mu bandi 30 bahanganye barimo n’abo bakina hamwe.
Tariki ya 28 Ukwakira 2024, nibwo hateganyijwe ibirori by’akataraboneka bibera mu Bufaransa, bigahemba abakinnyi baba baritwaye neza mu mwaka w’imikino warangiye.
Ubwo yaganiraga na Marca, Vinícius, yahishuye ko azi neza ko ari we uzegukana uyu mupira wa Zahabu.
Ati “Buri wese aranshyigikiye kandi ndabizi ko ari njye.”
Mu bakinnyi bahanganye n’uyu Munya-Brésil harimo abo bakinana aribo Jude Bellingham, Toni Kroos, Kylian Mbappé, Antonio Rüdiger na Federico Valverde. Real Madrid kandi iri mu makipe azatoranywamo iyabaye iy’umwaka.
