Général de Brigade Esmail Quaani wayoboraga umutwe udasanzwe w’Ingabo za Iran (Quds), yaburiwe irengero nyuma yo gusura Umujyi wa Beirut umaze iminsi uraswaho n’Ingabo za Israel.
Amakuru y’ibura ry’uyu musirikare Ibiro Ntaramakuru Reuters by’Abongereza byayahamirijwe n’abasirikare babiri bakuru b’abanya-Iran. Aba bavuze ko amaze icyumweru kirenga yaraburiwe irengero.
Gen Quaani yasuye Beirut nyuma y’ibitero Israel yagabye muri uyu murwa mukuru wa Liban byasize yivuganye Sayyed Hassan Nasrallah wari umuyobozi mukuru w’umutwe wa Hezbollah.
Amakuru avuga ko Qaani ubwo yaburirwaga irengero yari mu gace ka Dahiyeh ko mu majyepfo ya Beirut. Icyo gihe kandi Israel yarimo igaba ibitero yari igambiriye kwivuganiramo Hashem Safieddine wari umaze igihe gito afashe inshingano zo kuyobora Hezbollah.
Uyu na we amaze igihe yaraburiwe irengero nyuma y’ibyo bitero.
Gen Esmail Quaani yari umuyobozi w’umutwe udasanzwe w’Ingabo za Iran kuva muri 2020, asimbuye Gen Qassem Soleimani Ingabo za Leta Zunze Ubumwe za Amerika ziciye muri Iraq muri 2020.
Kuri ubu hari impungenge z’uko uyu musirikare na we yaba yarivuganwe na Israel, mu bitero bitandukanye ikomeje kugaba ku mutwe wa Hezbollah ushyigikiwe na Iran.
