Igitaramo byari byitezwe ko kizahuriza i Kigali abahoze mu itsinda rya Sauti Sol cyajemo impinduka kuko aho kugira ngo kibe ku wa 18 Ukwakira 2024, cyimuriwe ku wa 30 Ukwakira 2024.
Mu itangazo abateguye iki gitaramo bashyize hanze, bagaragaje ko izi mpinduka zatewe n’impamvu zitabaturutseho nubwo batigeze bazitangaza.
Icyakora ku rundi ruhande, bemeje ko abaguze amatike bazayifashisha ku munsi mushya w’iki gitaramo.
Iki gitaramo cyiswe ‘Sol Fest Kigali Pre Party’, kizabanziriza icyiswe Sol Fest giteganyijwe kubera i Nairobi muri Kenya ku wa 19-21 Ukuboza 2024.
Mu gitaramo kizabera i Kigali byemejwe ko kizitabirwa na Savara Mudigi, Bien-Aimé Baraza, Willis Chimano na Fancy Fingers bahoze muri Sauti Sol.
Iki gitaramo kandi kizagaragaramo abahanzi nka Mike Kayihura na Ariel Wayz, mu gihe aba DJs bavanga imiziki bo barimo DJ Sonia na DJ June.
Byitezwe ko ku wa 19 Ukuboza 2024 hazaba igitaramo cya Sol Fest cya VIP ndetse n’icyo ku wa 21 Ukuboza 2024 kigenewe abakunzi b’umuziki muri rusange.
Ni ibitaramo biteganyijwe kwitabirwa n’abahanzi barimo Khaligraph Jones na Nyashinski.
Iki gitaramo kigamije gusigasira isura n’icyubahiro cya Sauti Sol kizaba gikurikiye icyabaye mu 2023 cyitabiriwe n’abakunzi b’umuziki barenga ibihumbi 15.
