Isaiah Miller wafashije APR BBC kwegukana Igikombe cya Shampiyona, yerekeje muri San Antonio Spurs yo muri NBA, aho azajya anifashishwa cyane na Austin Spurs ikipe yayo ikina muri NBA G-League.
Miller aheruka guhesha Igikombe cya Shampiyona APR BBC mu kwezi gushize ndetse yanabaye umukinnyi wahize abandi mu Mikino ya Kamarampaka (betPawa Playoffs 2024).
Ku wa Mbere, tariki 14 Ukwakira 2024, Spurs yo muri NBA yatangaje ko yasinyishije uyu mukinnyi, nyuma yo gutandukana na Nathan Mensah.
Icyakora, Miller azajya yifashishwa cyane na Austin Spurs, ikipe ya San Antonio Spurs ikina Shampiyona igamije guteza imbere abakinnyi (NBA G-League).
Si ubwa mbere uyu mukinnyi anyura mu makipe akomeye kuko yanabaye muri Minnesota Timberwolves, Portland Trail Blazers na Utah Jazz.
San Antonio Spurs Miller yerekejemo, ni ikipe ikomeye muri NBA kuko yegukanye Igikombe cya Shampiyona inshuro eshanu, aho igiheruka mu 2014.
