Perezida wa Gasogi United, Kakooza Nkuriza Charles yatangarije APR FC ko azayitsinda ibitego 2-1, ntibitagenda uko, akazaha Umuvugizi w’Abafana b’Ikipe y’Ingabo, uburenganzira bwo kurira mu kabari ke ukwezi kose.
Ibi, uyu muyobozi yabigarutseho mu kiganiro Rirarashe gitambuka kuri Radio 1 cyo ku wa Gatanu, tariki 18 Ukwakira 2024.
Muri iki kiganiro, KNC yahamagaye Umuvugizi w’Abafana ba APR FC, Jangwani Frank bombi bahiga uko amakipe yabo azitwara, mu mukino bafitanye ku wa Gatandatu, tariki 19 Ukwakira 2024 saa Moya kuri Kigali Pelé Stadium.
KNC yahize ko agomba kuzatsinda APR FC ibitego 2-1.
Yagize ati “Uyu mukino, APR FC ntidatsindwa ibitego 2-1 wowe Jangwani nguhaye uruhushya (Green Card) yo kujya muri One for the Road ukarya ukwezi kose ku buntu.”
Ku rundi ruhande, Jangwani yatangaje ko abakinnyi be bose bameze neza ndetse ko igice cya mbere nikirangira ataratsinda Gasogi United ibitego 2, azandika ibaruwa isaba ko bayiha amanota atatu.
Ati “Niba igice cya mbere bitazaba ari 2-0, nzandika ibaruwa tuyihe ubuyobozi dusabe FERWAFA kuguha ayo manota (Gasogi) kuko uzaba uyakwiriye.”
Uko imyaka ishira, ni ko umukino wa Gasogi United na APR FC ugenda uzamura ihangana kubera amagambo aba yavuzwe mbere y’aho ndetse rimwe na rimwe, ibyo KNC yatangaje bikaba.
Mu mwaka ushize w’imikino, Gasogi United yasezereye Ikipe y’Ingabo mu Gikombe cy’Amahoro, ibikomeza umukino wo ku wa Gatandatu.
