Igisirikare cya Israel kirwanira mu kirere, cyagabye ibitero simusiga ahari icyicaro gikuru c’ishami rishinzwe ubutasi mu mutwe w’abarwanyi ba Hezbollah binahitana bamwe mu bayobozi b’uyu mutwe.
Ibyo bitero byabaye kuri uyu wa 20 Ukwakira 2024, bivugwa ko byanibasiye inyubako yo mu buvumo yakorerwagamo intwaro z’uyu mutwe, mu Murwa Mukuru wa Lebanon, Beirut.
Itangazo Israel yashyize hanze rivuga ko ingabo z’icyo gihugu zishe kandi Alhaj Abbas Salameh, wari mu buyobozi bwa Hezbollah, Radja Abbas Awache, umuhanga wari ushinzwe ibijyanye no gutangaza amakuru muri uwo mutwe na Ahmad Ali Hussein wari ushinzwe ibijyanye n’intwaro.
Israel ntiyatomoye ngo isobanure niba abo bayobozi b’uyu mutwe biciwe mu bitero igisirikare cyayo cyagabye ku cyicaro gikuru cya Hezbollah, aho uwo mutwe ukorera intwaro, cyangwa bakaba biciwe mu bindi bitero. Hezbollah ntacyo iratangaza kuri ayo makuru.
Abo Israel yemeza ko yishe, baje biyongera ku bandi bayobozi ba Hezbollah yishe ku wa gatanu, aho umwe muri bo ari Bint Jbeil, wari umuyobozi wungirije w’uyu mutwe.
Hagati aho, Israel yemeza ko yasenye n’inzira zacaga mu buvumo mu burasirazuba wa Lebanon zakoreshwaga n’abarwanyi ba Hezbollah.
