Igisirikare cya Israel, cyasabye imbabazi ku bw’abasirikare batatu ba Lebanon bishwe ku cyumweru mu gitero iki gihugu cyagabye mu burasirazuba, mu ntambara gihanganyemo n’umutwe wa Hezbollah.
Abasirikare batatu Israel isabira imbabazi, bahitanywe n’ibisasu byaguye ku modoka barimo. Umuvugizi w’igisirikare cya Israel, Daniel Hagari yavuze ko nta bitero Igihugu cye kigaba kigamije kwibasira Ingabo za Lebanon.
Israel yasabye imbabazi mu gihe intumwa idasanzwe ya Amerika, kuri uyu wa Mbere iri mu Murwa mukuru wa Lebanon, mu biganiro byo kureba uburyo haboneka agahenge k’intambara hagati ya Israel n’umutwe wa Hezbollah.
Abayobozi ba Lebanon bagomba kugirana ibiganiro na Amos Hochstein, barimo Minisitiri w’Intebe w’inzibacyuho ndetse na Nabih Berri, uyobora Inteko Ishinga Amategeko.
Hagati aho, kuri uyu wa mbere Israel yagabye ibindi bitero mu Murwa Mukuru wa Lebanon, Beirut no mu burasirazuba bw’icyo gihugu.
Israel ivuga ko irimo guhiga uko yagaba ibitero simusiga ku kigo cya al-Qard al-Hassan, gihemba abarwanyi ba Hezbzollah kikanabafasha kugura intwaro. Iki kigo, kandi ngo kinaguriza abaturage amafaranga kitabasabye inyungu. Ni ikigo kugeza ubu kiri mu bihano bya Amerika.
