Mu ijoro ryo ku wa 22 Ukwakira 2024, hakinwe imikino umunani y’umunsi wa gatatu wa UEFA Champions League 2024-2025 yasize Real Madrid na Arsenal zitahanye intsinzi.
Mu Budage hari umukino ukomeye wahuzaga Borussia Dortmund na Raal Madrid zakinnye umukino wa nyuma umwaka ushize. Real Madrid n’ubwo yabanjwe ibitego 2-0 mu gice cya mbere bitsinzwe na ku munota wa 30 Donyel Mallen na Gittens kuwa 34, byarangiye inyagiye Dortmund 5-2 byose yatsinze mu gice cya kabiri bitsinzwe na Antonio Rudiger ku munota wa 60, Lucas Vazquez kuwa 73 na Vinicius Junior watsinze bitatu ku munota wa 62,86 n’uwa gatatu w’inyongera (90+3), iyi kipe itahana amanota atatu yuzuzuga atandatu mu mikino itatu dore ko ku munsi wa kabiri yari yatsinzwe.
Mu Bwongereza Arsenal nayo yashakishaga intsinzi ya kabiri nyuma yo kunganya umukino wa mbere na Atalanta, igatsinda PSG mu mukino wa kabiri, kuri iyi nshuro yari yakiriye Shaktar yo muri Ukraine inayitsinda igitego 1-0 cyitsinzwe na Roznyk ku munota wa 29 w’umukino. Iyi ntsinzi yatumye iyi kipe igira amanota arindwi ayishyira ku mwanya wa kane n’amanota arindwi by’agateganyo.
Mu yindi mikino yabaye AS Monaco yatsinze Crvena Zvezda 5-1, Milan AC itsinda Club Brugge 3-1, Aston Villa ya mbere n’amanota icyenda ku yandi itsinda Bologna 2-0, Juventus itsindirwa mu rugo na Stuttgart 1-0, PSG mu rugo inganya na PSV 1-1 naho Girona itsinda Slovan 2-0.
