FC Barcelona yanyagiye Bayern Munchen ibitego 4-1 , mu gihe Liverpool yabonye amanota atatu yayifashije gufata umwanya wa kabiri mu itsinda ryayo.
Mu ijoro ryo ku wa Gatatu, tariki ya 23 Ukwakira 2024, hakinwe indi mikino y’umunsi wa gatatu wa UEFA Champions League.
Mu gihugu cya Espagne ku kibuga Olmpic Lluis Companys FC Barcelona yari yakiriye Bayern Munchen yo mu Budage.
FC Barcelona yari iwayo yinjiye mu mukino mbere ndetse ku munota wa mbere Raphinha yatsinze igitego ku mupira mwiza yahawe na Fermín López.
Nyuma yo gutsindwa igitego Bayern Munchen yagarukanye imbaraga maze ku munota 18 Serge Gnabry yazamukanye umupira mwiza mwiza awutanga kwa Harry atsinda igitego cyo kwishyura.
Lamine Yamal yateye umupira muremure, myugariro Kim Min-Jae ananirwa kuwukuraho usanga Fermín López awutanga kwa Robert Lewandowski atsinda igitego cya kabiri ku munota wa 36.
Barcelona yari mu mukino cyane, yakomeje kwiharira umupira maze ku munota wa 45, Marc Casado atera umupira muremure ari hagati mu kibuga, usanga Raphinha ku ruhande rw’ibumoso azamuka wenyine atsinda igitego cya gatatu.
Igice cya mbere cyarangiye FC Barcelona yatsinze Bayern Munich ibitego 3-1.
Mu gice cya Kabiri, Bayern Munchen yagarukanye imbaraga nyinshi isatira cyane mu minota 10 ya mbere.
Yamal yateye umupira muremure usanga Raphinha awushyira ku gatuza, azamuka muri ba myugariro babiri ba Bayern abatsindana igitego cya kane cya FC Barcelona, kiba icya gatatu cye muri uyu mukino, ku munota wa 57.
Umutoza wa Bayern Munich, Vincent Kompany yahise akora impinduka enye, abarimo Leon Goretzka, Kingsley Coman, Jamal Musiala na Leroy Sané binjira muri İzi mpinduka nta musaruro zatanze kuko batateraga mu izamu.
Umukino warangiye FC Barcelona yanyagiye Bayern Munich ibitego 4-1 birimo bitatu bya Raphinha watowe nk’umukinnyi w’umukino (Match of The Match).
İndi mikino yabaye, Manchester City yanyangiye Sparta Prague ibitego 5-0, Liverpool yatsinze RB Leipzig ibitego 2-0 ifata umwanya wa kabiri ku rutonde rw’agateganyo n’amanota icyenda inganya ya Aston Villa ya mbere izigamye ibitego bitandatu.
Atletico Madrid yatsindiwe mu rugo na Lille ibitego 3-1, Benfica yatsinzwe na Feyenoord ibitego 3-1, Salzburg yatsinzwe na Dinamo Zagreb ibitego 2-0, Young Boys yatsinzwe na Inter Milan igitego 1-0.
