Kiyovu Sports ya nyuma muri Shampiyona, yahagaritse imikino ine Umutoza Joslin Bipfubusa, mu gihe Malick Wade utoza abana ari we usigarana ikipe.
Mu mpera z’icyumweru, Urucaca rwatsinzwe na Bugesera FC ibitego 2-1 rwuzuza imikino itanu rutsindwa, bituma birushyira ku mwanya wa nyuma muri Shampiyona n’amanota atatu gusa.
Umunyamabanga Mukuru wa Kiyovu Sports, Karangwa Jeanine avuga ko intsinzwi zari zimaze kuba nyinshi.
Yagize ati “Nibyo twamuhagaritse imikino ine, Malick Wade utoza abana niwe ugiye gusigarana ikipe.”
Kenshi mu Rwanda iyo umutoza yahagaritswe igihe kinini gutya, bikunze kurangira adakomezanyije n’ikipe bityo n’aha bikaba byitezwe.
Nubwo bimeze bityo, Urucaca rumerewe nabi cyane kuko ruri gukoresha abakinnyi bo mu makipe y’abato cyane ko abo rwaguze byahuriranye n’ibihano bakaba batakoreshwa.
Si abo gusa kuko n’abasanzwe bagenda bivumbura kubera ibirarane iyi kipe ibabereyemo.
Mu mpera z’icyumweru, Kiyovu Sports izasura mukeba wayo Rayon Sports, ku wa Gatandatu, tariki 2 Ugushyingo 2024 kuri Kigali Pelé Stadium.
