Max Verstappen yongeye guhabwa ibihano bimukuraho amasegonda 10 inshuro ebyiri, nyuma yo kubangamira umukinnyi mugenzi we Lando Norris mu isiganwa.
Ibi ni bimwe mu byaranze isiganwa rya Mexico City Grand Prix, ryakinwe ku mugoroba wa tariki ya 27 Ukwakira 2024, rikaba irya 20 mu masiganwa agize umwaka w’imikino muri Formula 1.
Norris na Verstappen ni bo bakinnyi basa n’abahanganiye igikombe cya Formula 1 ya 2024, dore ko aba bombi ari bo bakurikirana ku rutonde rw’agateganyo mu gihe habura amasiganwa ane gusa.
Ubwo bari muri Mexico GP, Norris yagerageje gucunga Verstappen no kumubuza amahwemo kugeza igihe afashe umwanzuro wo kumugonga akamutesha umurongo byatumye Norris ava mu muhanda.
Ibi Verstappen yabihaniwe gukurwaho amasegonda 10, aza kongera gukurwaho andi nk’ayo ubwo yageragezaga kurenga umuhanda akanyura mu nzira y’ubusamo ubusanzwe bitemewe.
Verstappen uherutse mu bindi bihano azira gukoresha amagambo y’ikinyabupfura gike, yahise yisanga ku mwanya wa gatandatu muri iri siganwa, mu gihe Norris yabaye uwa kabiri inyuma ya Carlos Sainz waritangiye ari uwa mbere akarinda arisoza ayoboye.
Uyu mukinnyi ukoresha imodoka ya Red Bull Racing Honda RBPT yakomeje kuyobora urutonde rusange n’amanota 362, akarusha Norris utwara McLaren Mercedes amanota 41.
