Mu ijoro ryo kuri uyu wa Gatatu tariki 30 Ukwakira 2024, Manchester United yatsinze Leicester City ibitego 5-2, abakunzi bayo bongera kubona ibyishyimo bataherukaga, ibintu bishobora kuba byasigiye ubutumwa Chelsea bizakina ku Cyumweru.
Mu minsi ishyize nibwo Manchester United yafashe umwanzuro wo gutandukana na Eric Ten Hag ukomoka mu Buholandi kubera umusaruro muke yari ari guhesha ikipe kandi yaraguze abakinnyi bose yifuzaga.
Nyuma yo kwirukanwa kwa Eric Ten Hag, ikipe yasigaye mu biganza bya Ruud van Nistelrooy nk’umutoza uraba ayitoza mu gihe ubuyobozi bw’iyi kipe buri kuganiriza uzafata inshingano zo kuba umutoza mukuru.
Umukino wa mbere wa Ruud van Nistelrooy yatsinze Leicester City ibitego 5-2 mu mikino ya EFL Cup ikipe yongera kubona intsinzi. Ni umukino Manchester United yafunguye amazamu ku munota wa 15 ku gitego cyatsinzwe na Casemiro ku mupira yahawe na Alejandro Garnacho.
Abakinnyi ba Manchester United bari banyotewe no kongera kubona intsinzi, muri uyu mukino bakinnye na Leicester City Alejandro Garnacho yatsinze igitego cya Kabiri ku munota wa 28 abikora ku mupira yahawe na Diogo Dalot. Ku munota wa 36 Bruno Fernandez yatsindiye Manchester United igitego cya gGatatu naho Casemiro atsinda icya Kane ku munota wa 39.
Eli Channius wa Leicester City we yatsinze igitego ku munota wa 33 na Conor Ciady ku munota wa 45+3 nuko igice cya mbere kirangira Manchester United ifite ibitego bine kuri bibiri bya Leicester City.
Mu gice cya Kabiri abasore ba Manchester United ntabwo bagarukanye imbaraga nk’izo bakoresheje mu gjce cya mbere kuko babonye igitego cya Gatanu ku munota wa 89 Ggitsinzwe na Bruno Fernandez.
Gutsinda uyu mukino byatumye Manchester United ikatisha itike ya kimwe cya Kane aho izahura na Tottenham Hotspur.
Uko amakipe azacakirana muri kimwe cya Kane ni Manchester United izahura na Tottenham Hotspur, Arsenal ikine na Crystal Palace, Newcastle ikine na Brentford naho Southampton icakirane na Liverpool.
Imbaraga zidasanzwe Manchester United yongeye kugaragaza imbere ya Leicester City zateye ubwoba Chelsea izacakirana na Manchester United kuri iki cyumweru ku itariki 3 Ugushyingo 2024 mu mikino ya English Premier League.
