Umunyabigwi mu Iteramakofe, Mike Tyson, yaciye igikuba nyuma yo gutangaza ko ashaka gupfira mu rurwaniro (ring) mu gihe afitanye umukino na Jake Paul mu Ugushyingo.
Tyson azasubira mu rurwaniro ku wa 15 Ugushyingo aho azaba ahanganye na Jake Paul wamamaye ku mbuga nkoranyambaga, mu murwano uzerekanwa kuri Netflix.
Aba bagabo bombi bagombaga kurwana muri Nyakanga ariko umukino wabo uza kwimurwa nyuma y’uko Tyson yagize ibibazo by’ubuzima mbere yaho.
Tyson wabaye umwami mu ndwanyi z’ibilo biremereye, ubu akaba afite imyaka 58, nta murwano ukomeye yigeze akina muri iyi myaka 20 ishize none agiye guhura na Jake Paul w’imyaka 28.
Kuri ubu, yaciye igikuba nyuma yo kuvuga ko yahitamo “gupfira mu rurwaniro” kurusha uko yaba ari mu gitanda cy’ibitaro.
Jake Paul bagiye guhura, yatsinzwe umukino umwe gusa mu mirwano 11 aheruka gukina.
Tyson yavuze ko azabaho ubuzima bwose naramuka yegukanye intsinzi muri uyu murwano uzabera muri AT&T Stadium muri Texas.
Mu kiganiro yatangiye kuri Netflix, yagize ati “Nta kintu nakora mu gihe naba ntashaka guseba. Nk’ubu ndashaka kurwana n’iyi nyigaguhuma.”
Yongeyeho ati “Ni ibintu birenze kuri njye, nintsinda sinzigera mpfa. Nimbikora nabi, sinshaka gupfira mu buriri bw’ibitaro, ndashaka gupfira mu rurwaniro.”
Tyson yasoje gukina kinyamwuga mu 2005, mu gihe aheruka kurwana byo kwishimisha mu 2020 ubwo hakusanywaga amafaranga yo gufasha abatishoboye.
Ku rundi ruhande, Paul yatsinze Nate Diaz mu murwano we wa 11 nk’uwabigize umwuga muri Kanama 2023 mu gihe muri Werurwe uwo mwaka yari yatsinze Ryan Bourland.
Aba bagabo babiri bafite amazina akomeye mu mateka y’iteramakofe, bahuye bwa mbere mu 1996 i Las Vegas, aho Evander yarushije Mike Tyson mbere yo kumutsinda mu gace ka 11.
Tyson na Holyfield bongeye gusubiramo umurwano wabo mu 1997, ari bwo Tyson yarumye Evander ugutwi, agasezererwa mu gace ka gatatu k’umurwano.
Tyson yatsinze imirwano 50 muri 58 yakinnye. Kugeza mu 1990, yari ataratsindwa kugeza ubwo yatungurwaga na Buster Douglas mu murwano watunguranye mu mateka y’Iteramakofe.
Paul yatsinze imirwano 10 muri 11 amaze gukina, aho imyinshi muri yo yayihuyemo n’abakina UFC. Uwo yatsinzwe n’uwo yahuyemo n’Umwongereza Tommy Fury muri Gashyantare 2023.
