Kiyovu Sports yatsinzwe na Gasogi United ibitego 4-3 mu mukino w’umunsi wa cyenda wa shampiyona, iguma ku mwanya wa nyuma muri shampiyona.
Uyu mukino wabaye kuri uyu wa Kabiri tariki 5 Ugushyingo 2024, kuri Kigali Pele Stadium.
Amakipe yombi yagiye gukina uyu mukino yatsinzwe imikino yayo ku munsi wa munani, Kiyovu Sports yanyagiwe na Rayon Sports ibitego 4-0 mu gihe Gasogi United yatsinzwe na Etincelles igitego1-0.
Ku munota wa 11 ni bwo uburyo bukomeye muri uyu mukino bwabonetse ubwo Muderi Akbar wa Gasogi United yazamukanaga umupira ari kumwe na Mugisha Joseph ariko bateye mu izamu Niyonkuru Ramadhan awushyira muri koruneri.
Ku munota wa 14’ Gasogi United yafunguye amazamu ku igitego cyatsinzwe na Christian-Theodor Yawanendji-Malipangou, nyuma yo gutera ishoti rikomeye ari hanze y’urubuga rw’amahina.
Nyuma y’iminota ibiri gusa, Kiyovu Sports yishyuye igitego gitsinzwe na Nizeyimana Djuma.
Ku munota wa 20’ Gasogi United yatsinze igitego cya kabiri cya Kapiteni Muderi Akbar ikomeza kuyobora umukino.
Gasogi United yarushaga Kiyovu Sports muri iyo minota yatsinze cya Gatatu cya Christian-Theodor Yawanendji-Malipangou kuri Coup- Franc, ku ikosa rya ryakorewe hafi y’izamu ryari ririnzwe na Nzeyurwanda Djihad.
Umutoza wa Kiyovu Sports, Malick Wade, yakoze impinduka ku munota wa 39, akuramo Niyonkuru Ramadhan ashyiramo Mugisha Desire.
Mbere y’uko igice cya mbere kirangira, umusifuzi wa kane yongeyeho iminota ibiri y’inyongera.
Ku munota wa 47’ Kiyovu Sports yatsinze igitego cya kabiri yatsinzwe na Mugisha Desire.
Igice cya mbere cyarangiye Kiyovu Sports itsinzwe na Gasogi United ibitego 3-2.
Mu gice cya kabiri, Kiyovu Sports yashakaga kwishyura, ndetse igakinira cyane mu kibuga cya Gasogi United yasabwaga kwitonda kugira ngo itagomborwa.
Nizeyimana Djuma yongeye guhusha igitego ku mumota wa 57, biturutse ku mupira yari aherejwe na Nizigiyimana Karima, akawakirira mu rubuga rw’amahina ariko yatera mu izamu ugaca hafi gato yaryo.
Ku munota wa 75’ Gasogi yatsinze igitego cya kane cyatsinzwe na Ndikuman Dany ku mupira mwiza yahawe na Theodore Malipangou acenze abakinnyi bari mu bwugarizi bwa Kiyovu Sports.
Ku munota wa 86’ Kiyovu Sports yabonye igitego cya gatatu cyatsinzwe na Dufitimana Pacifique ku mupira mwiza yahawe na Sherif Bayo.
Umukino warangiye Kiyovu Sports itsinzwe na Gasogi United ibitego 4-3.
Gasogi United yahise ifata umwanya wa gatanu n’amanota 14 mu gihe Kiyovu Sports yagumye ku mwanya wa nyuma n’amanota atatu n’umwenda w’ibitego 14.
