Team Manager wa APR FC, Rtd Capt Ntazinda Eric, yahagaritswe ku mirimo ye nyuma y’amakosa yakozwe ku mukino wa Gorilla FC, ubwo iyi kipe yakinishaga abakinnyi b’abanyamahanga barenze umubare w’abateganywa n’amategeko.
Capt (Rtd) Ntazinda Eric abinyujije ku rubuga rwa Whattsapp yatangaje ko amakosa yakozwe byari ngombwa ko ahanwa.
Atı: “Amakosa twarayakoze kandi aremereye, kandı agomba gukosorwa. Ni byo rero, ni kuriya yahanwe.”
Ku Cyumweru, tariki ya 3 Ugushyingo 2024, ni bwo hakinwe umukino w’umunsi wa munani wa Shampiyona y’u Rwanda, wahuje Ikipe ya APR FC na Gorilla FC.
Mu gice cya kabiri APR FC yakoze impinduka ikuramo Richmond Lamptey ukomoka muri Ghana na Tuyisenge Arsène, basimburwa na Nwobodo Chidiebere wo muri Nigeria na Mamadou Sy wo muri Mauritania.
Abo banyamahanga babiri binjiye basanga mu kibuga abandi banyamahanga batanu ari bo Pavelh Ndzila, Aliou Souane, Taddeo Lwanga, Lamine Bah na Victor Mbaoma.
Ibyo byari bihabanye n’amategeko y’amarushanwa ya FERWAFA agenga ko abanyamahanga bagomba kuba bari mu kibuga batagomba kurenga batandatu ndetse n’icumi ku rupapuro rw’umukino, bakajya basimburanwa hagati yabo.
Nyuma yo kubona ibyo, benshi bari kuri Kigali Pelé Stadium baguye mu kantu bibaza uko bigenze, ariko Perezida wa Gorilla FC. Mudaheranwa Hadji Youssuf, yahise yandika ibaruwa irega APR FC mbere y’uko umukino unarangira.
Kugeza ubu FERWAFA nta mwanzuro iratangaza kuri iki kirego cyatanzwe n’iyo kipe.
Muri Nyakanga 2023 ni bwo Rtd Cpt Ntazinda Eric yagizwe Team Manager wa APR FC asimbuye Maj Uwanyirimpuhwe Jean Paul.
