Amajwi yatangiye kubarurwa nyuma y’amatora y’Umukuru w’Igihugu yabaye muri Leta Zunze Ubumwe za Amerika ku wa Kabiri tariki ya 5 Ugushyingo, arerekana ko Donald Trump wo mu ishyaka ry’aba-Republicain ari imbere ya mukeba we, Kamala Harris wo ku ruhande rw’aba-Democrates.
Kugeza ubu aba bakandida bombi bari gutanguranwa kugeza ku majwi 270 atangwa hagendewe ku mubare wa za Leta zigize Leta Zunze Ubumwe za Amerika.
Amajwi amaze kubarurwa kuri ubu arerekana ko Trump umaze gutorwa n’abarenga miliyoni 61 ari imbere n’amajwi 230; ibisobanuye ko abura amajwi 40 yonyine agasubira muri White House yasohotsemo mu myaka igera kuri itanu ishize ubwo yatsindwaga na Joe Biden bari bahatanye.
Visi-Perezida Kamala Harris umaze gutorwa n’ababarirwa muri miliyoni 56 ari inyuma n’amajwi 169; ibisobanura ko akibura amajwi 101 ngo yandike amateka yo kuba umugore wa mbere uyoboye Leta Zunze Ubumwe za Amerika.
Amatora yo muri Amerika ahanini ashingira kuri Leta zirindwi zizwi nka ‘swing states’ ziba zifite amajwi menshi kurusha izindi, ari na zo zigena utsinda.
Izi Leta zirimo iya Arizona, Georgia, Michigan, Nevada, North Carolina, Pennsylvania na Wisconsin.
Muri izi Leta amajwi yo muri North Carolina ni yo yamenyekanye gusa, aho Trump ari we wayegukanyemo intsinzi.
Donald Trump yatsindiye kandi Leta ya Arkansas na South Carolina, Leta n’ubundi yari yatsindiye mu matora ya 2020. Arkansas igira amajwi atandatu ya Electoral College, South Carolina ikagira amajwi icyenda.
Yanatsindiye Leta ya Florida iri mu zikomeye cyane dore ko ifite amajwi 30 ya Electoral College, iya West Virginia ifite amajwi ane ya Electrol College, iya Tennessee ifite amajwi 11 ya Electoral College na Alabama ifite icyenda, iya Oklahoma y’amajwi arindwi, Missouri y’amajwi 10, Idaho, Louisiana, Ohio, Wyoming, South Dakota, North Dakota na Texas.
Kamala Harris we yatsindiye District of Columbia ifite amajwi atatu ya Electoral College, Maryland ifite amajwi 10 na Massachusetts y’amajwi 11. Yatsindiye kandi California, Colorado na Delaware.
