APR FC yemeje ko Maj Kavuna Elias yagizwe Team Manager, naho Kalisa Georgine ntiyongererwa amasezerano nk’umukozi ushinzwe umutungo w’iyi kipe.
APR FC iherutse guhagarika Eric Ntazinda wari usanzwe ari Team Manager w’iyi kipe nyuma y’amakosa y’imisimburize yabaye ku mukino yanganyijemo na Gorilla 0-0.
Ni amakosa ubuyobozi bwa APR FC bwagaragaje ko akomeye nyuma yo gushyira mu kibuga abakinnyi barindwi b’abanyamahanga kandi hari hemewe batandatu, bunavuga ko bugomba kwemera ingaruka.
Nyuma yo guterwa mpaga y’ibitego 3-0 kuri uyu mukino wari wayihuje na Gorilla FC, yatangiye gukora impinduka mu buyobozi, aho yahise igira Maj Kavuna Elias umuyobozi ushinzwe ubuzima bwa buri munsi bw’ikipe.
Si ubwa mbere uyu mugabo ahawe izi nshingano kuko yaziherukaga muri iyi kipe mu 2021.
Usibye uyu muyobozi kandi, APR FC yafashe icyemezo cyo kutongerera amasezeranp Kalisa Georgine wari ushinzwe umutungo muri iyi kipe yegukanye Igikombe cya Shampiyona giheruka (2023/24).
Maj Kavuna asanze APR FC iri ku mwanya wa 15 n’amanota ane mu mikino itatu imaze gukina, ikaba igomba guhura na Vision FC kuri Kigali Pelé Stadium kuri uyu wa Kane, mu mukino w’Umunsi wa Cyenda wa Shampiyona y’u Rwanda.
