Ikipe y’Igihugu y’u Rwanda ya Basketball yatsinzwe n’iya Mali amanota 69-63 mu mukino wa mbere wa gicuti, mu myiteguro y’imikino yo gushaka itike y’Igikombe cya Afurika.
Uyu mukino wabaye mu ijoro ryo ku wa Kabiri, tariki 19 Ugushyingo 2024 i Dakar muri Sénégal.
Amakipe yombi akomeje kwitegura imikino yo gushaka itike y’Igikombe cya Afurika na yo iteganyijwe kubera muri Sénégal tariki ya 22 kugeza 24 Ugushyingo 2024.
U Rwanda rwatangiye neza umukino, Shema Osbron arutsindira amanota menshi. Igice cya mbere cyarangiye ruyoboye n’amanota 42 kuri 31 ya Mali.
Mu gice cya kabiri, Umutoza w’Ikipe y’Igihugu y’u Rwanda, Dr. Cheikh Sarr, yakomeje gukora impinduka nyinshi ari na ko Mali yinjira mu mukino itangira gutsinda amanota menshi.
Umukino warangiye, Mali yigaranzuye u Rwanda irutsinda amanota 69-63.
U Rwanda rurakina umukino wa kabiri wa gicuti na Sudani y’Epfo kuri uyu wa Gatatu, saa 23:00 z’i Kigali.
Mu mikino yo gushaka itike y’Igikombe cya Afurika, u Rwanda ruri mu itsinda rya gatatu hamwe na Sénégal, Cameroun na Gabon.
