Imikino ya UEFA Champions League yakomeje gukinwa, Bayern Munich yatsinze Paris Saint-Germain igitego 1-0, mu gihe Manchester City yanganyirije mu rugo na Feyenoord ibitego 3-3, yuzuza umukino wa gatandatu wikurikiranya nta nsinzi mu marushanwa yose.
Mu ijoro ryo ku wa Kabiri, tariki ya 26 Ugushyingo 2024, ni bwo habaye imikino y’umunsi wa gatanu wa UEFA Champions League, aho hakinwe igera ku icyenda mu mijyi itandukanye.
Umukino wari uhatse indi yose wabereye Allianz Arena, hagati ya Bayern Munchen yo mu Budage na Paris Saint-Germain yo mu Bufaransa.
Bayern Munich nk’ikipe yakiniraga iwayo yinjiye mu mukino mbere ndetse no ku munota wa karindwi yari yamaze gutera ishoti rya mbere rikomeye mu izamu ryashoboraga kuvamo gitego ariko umunyezamu wa PSG, Matvei Safonov aratabara.
Ku munota wa 28 iyi kipe yongeye kugerageza irindi shoti ryatewe na Kingsley Coman wari mu rubuga rw’amahina ariko ku bw’amahirwe make urazamuka urenga izamu.
Uburyo bwa PSG bwabonywe na Ousmane Dembele ku munota wa 32, ubwo yageragezaga gutera ishoti ariko umunyezamu Manuel Neuer arinaga awusubiza mu kibuga.
Min-Jae Kim wa Bayern Munich ni we wafunguye amazamu muri uyu mukino kuko yatsinze gitego ku munota wa 38, umusifuzi Istvan Kovacs abanza kugira ngo yaraririye ariko VAR imufasha kucyemeza.
PSG yagiye mu karuhuko k’iminota 15 iri inyuma ho igitego 1-0, ndetse mu ntangiriro z’icya kabiri ihita inabona ikarita y’umutuku yahawe Ousmane Dembélé wari ukoze ikosa rya kabiri ry’ikarita y’umuhondo.
Indi mikino yabaye ku wa Kabiri Arsenal yatsindiye na Sporting CP iwayo muri Portugal ibitego 5-1, byatsinzwe na Gabriel Martinelli, Kai Havertz, Gabriel Magalhães, Bukayo Saka na Leandro Trossard.
Manchester City ikomeje kuba mu bihe bibi kuko yagize umukino wa gatandatu wikurikiranya mu marushanwa yose itabona intsinzi nyuma yo kunganya na Feyenoord ibitego 3-3.
Atletico Madrid yatsinze Sparta Prague ibitego 6-0, Slovan Bratislava itsindwa na AC Milan ibitego 3-2 na FC Barcelone itsinda Brest ibitego 3-0 mu mukino Robert Lewandowski yatsinzemo igitego cye cya 100 muri UEFA Champions League.
Inter Milan yatsinze RB Leipzig igitego 1-0, Bayer Leverkusen inyagira Salzburg 5-0 na Young Boys yanyagiriwe iwayo na Atalanta ibitego 6-1.
Kuri uyu wa Gatatu tariki 27 Ugushyingo 2024 indi mikino irakomeza, umukino utegerejwe na benshi urahuza Liverpool na Real Madrid saa yine z’ijoro
