APR FC yatsinze Bugesera FC ibitego 2-0 mu mukino w’ikirarane w’umunsi wa kabiri utarabereye igihe, ikomeza kuzamuka ku rutonde rw’agateganyo rwa shampiyona.
Uyu mukino wabaye ku mugoroba wo kuri uyu wa Gatatu tariki 27 Ugushyingo 2024, kuri Kigali Pele Stadium.
APR FC yatangiranye umukino imbaraga zikomeye, ku mumota wa gatanu gusa Byiringiro Gilbert yateye ishoti rikomeye, umunyezamu Mfashingabo Didier arikuramo umupira awushyira muri koruneri.
Ku munota wa munani, rutahizamu wa Bugesera FC Djodjo Nkombe, yahushije igitego cyabazwe ku buryo bwiza yisanze asigaranye n’umunyezamu Pavelh Ndzila ateye umupira ujya hanze y’izamu.
Mu minota 20, APR FC yakomeje gusatira ariko itagera mu izamu ngo ireme uburyo bukomeye bw’ibitego.
Ku munota wa 28, iyi kipe yongeye guhusha igitego, ku mupira Mamadou Sy yahereje Niyibizi Ramadhan ateye mu izamu umupira ujya hejuru gato y’izamu.
Ku munota wa 39’ APR FC yafunguye amazamu ku gitego cyatsinzwe na Lamine Bah ku mupira wakuwemo nabi n’umuzamu Mfashingabo Didier,usanga Mahamadou Lamine Bah atsinda igitego cya mbere.
Igice cya mbere cyarangiye APR FC iyoboye umukino n’igitego 1-0 cyatsinzwe na Lamine Bah.
Mu gice cya kabiri, APR FC yakomeje gusatira ari na ko yakoze impinduka, Taddeo Lwanga asimbura Lamine Bah.
Ku munota wa 62, Niyibizi Ramadhan yatsinze igitego cya kabiri ariko umusifuzi Twagirumukiza Abdulkarim aracyanga avuga ko yari yaraririye.
Mu minota 70, APR FC yakomeje gukora impinduka, Tuyisenge Arsène na Chediebere Johnson basimbura Mamadou Sy na Mugisha Gilbert.
Akigera mu kibuga, Tuyisenge yacomotse azamukana umupira yihuta cyane asigarana n’umunyezamu Arakaza MacArthur, ashatse kumurenza umupira uba munini ujya hejuru y’izamu.
Ku munota wa 79 ‘APR FC yabonye igitego cya kabiri cyatsinzwe na Ramadhan Niyibizi kuri Penaliti nyuma y’ikosa Umunyezamu wa Bugesera FC Arakaza, wateze Tuyisenge Arsène mu rubuga rw’amahina.
Umukino warangiye APR FC itsinze Bugesera FC ibitego 2-0 mu mukino w’ikirarane ikomeza kwicuma ku rutonde rw’agateganyo rwa Shampiyona.
APR FC yahise ifata umwanya wa gatandatu n’amanota 14 mu mikino irindwi imaze gukina mu gihe Bugesera FC yafashe umwanya wa 14 n’amanota umunani.
APR FC izagaruka mu kibuga ku Cyumweru tariki 1 Ukuboza 2024, yakirwa na AS Kigali mu mukino w’umunsi wa 11 wa Shampiyona, naho Bugesera FC izasura Muhazi United ku wa Gatandatu tariki 30 Ugushyingo 2024.
