Umunya Nigeria Ademola Lookman ukinira Atalanta yo mu Butaliyani yegukanye igihembo cy’umukinnyi w’Umunyafurika mwiza w’umwaka wa 2024, gitangwa na CAF mu muhango wagaragayemo ibihangange byubatse ibigwi mu bihe bitandukanye mu mupira w’amaguru.
Uyu muhango wo guhemba abitwaye neza mu byiciro bitandukanye muri Afurika wabaye ku mugoroba wo ku wa Mbere tariki 16 Ukuboza 2024, mu nyubako ya Palais des Congrès I Marrakech mu gihugu cya Morocco.
Ni umuhango witabiriwe n’abanyacyubahiro batandukanye barimo Perezida wa FIFA Gianni Infantino, Umuyobozi w’impuzamashyirahamwe y’umupira w’amaguru muri Afurika CAF, Patrice Motsepe n’abakinnyi bakanyujijeho nka Samuel Eto’o, El Hadji Diouf n’abandi batandukanye.
Ademola Lookman yafashije Atalanta kwegukana UEFA Europa League itsinze Bayern Leverkusen ibitego 3-0 byose byatsinzwe n’uyu Rutahizamu w’umunya Nigeria ukina aciye ku ruhande rw’ibumoso.
Lookman kandi yafashije Nigeria kwegukana umwanya wa kabiri mu Gikombe cya Afurika cya 2023 aho yatsinze ibitego bitatu.
Igihembo giheruka cya 2023 cyari cyegukanywe na Victor Osimhen nawe ukomoka muri Nigeria.
Igihugu cyatwaye iki gihembo inshuro nyinshi ni Cameroun imaze kukegukana inshuro 11, Côte d’Ivoire ifite umunani, Ghana ifite bitandatu na Nigeria ifite birindwi.
Kugeza ubu abakinnyi begukanye iki gihembo inshuro nyinshi ni Yaya Touré wakiniye Manchester City wagihawe inshuro enye (2011, 2012, 2013 na 2014), Samuel Eto’o (2003, 2004, 2005 na 2010) naho El Hadji Diouf, Nwankwo Kanu na Didier Drogba, Mohammed Salah na Sadio Mane bagitwaye inshuro ebyiri buri umwe.
Umukinnyi mwiza w’umwaka wa 2024 mu bagore yabaye Umunya Zambia Barbra Banda ukinira Orlando Pride
Uyu mwaka yatowe kandi nk’umukinyi mwiza mu bihembo bya BBC Women’s Footballer atsinze Umunya Espagne Aitana Bonmati ukinira Barcelona FC.
Umukinnyi ukiri muto utanga icyizere yongeye kuba umunya- Sénégal Lamine Camara ukinira AS Monaco yo mu Bufaransa wegukanye iki gihembo ku nshuro ya kabiri yikurikiranya (2023 na 2024), mu gihe mu bagore yabaye umunya Morocco Doha El Madani.
Nigeria yabaye ikipe y’igihugu y’umwaka mu bagore mu gihe mu bagabo iya Côte d’Ivoire yegukanye igikombe cya Afurika cya 2023.
Ikipe yitwaye neza mu marushanwa y’umwaka ku makipe ( Clubs) yongeye kuba Al Ahly yo mu Misiri ku nshuro ya kabiri yikurikiranya ( 2023 na 2024), mu gihe mu bagore yabaye TP Mazembe yo muri Repubulika Iharanira Demokarasi ya Congo yegukanye CAF Champions League y’abagore.
Umukinnyi mwiza imbere muri Afurika yabaye umunyafurika y’Efo Ronwen Williams ukinira Mamelodi Sundowns, mu gihe mu bagore yabaye umunya Morocco Sanna Mssoudy ukinira FAR Rabat yo muri Morocco.
Umuzamu mwiza w’umwaka mu bagabo yabaye Umunyafurika y’Epfo Ronwen Williams naho mu bagore yongeye kuba umunya Nigeria Chiamaka Nnadozie ukinira Paris FC yo mu Bufaransa wegukanye iki gihembo ku nshuro ya kabiri yikurikiranya (2023 na 2024).
Umutoza mwiza w’umwaka mu bagore yabaye Lamia Boumedhi utoza TP Mazembe yo muri RDC yegukanye CAF Women Champions League.
Umutoza w’umwaka mu bagabo yabaye Umunya Côte d’Ivoire Emerse Faé wafashije Côte d’Ivoire kwegukana igikombe cya Afurika cya 2023.
Umukinnyi watsinze igitego cy’umwaka yabaye Mabululu ukinira ikipe y’igihugu ya Angola na AL Ahly Tripoli yo muri Libya.
Ku nshuro ya mbere CAF yahembye abasifuzi bahize abandi mu bagabo n’abagore.
Mu Bagabo umusifuzi w’umwaka yabaye Umunya Libya Mutaz İbrahim usifura mu kibuga, Umusifuzi wungirije mwiza yabaye umunya Cameron Elvis guy Noupue.
Mu bagore, umusifuzi mwiza w’umwaka yabaye Umunya Morocco Bouchra Karkoub naho Umusifuzi wungirije mwiza yabaye Umunya Zambia Diana Chitotesha.
CAF kandi yahembye Abayobozi Bakuru b’Ibihugu bagize uruhare mu iterambere ry’umupira w’amaguru ku Mugabane wa Afurika barimo Perezida wa Misiri Abdel Fattah Saeed Hussein Khalil El-Sisi na Perezida wa Cameron Paul Biya.
