Ikipe y’Igihugu y’u Rwanda ‘Amavubi’ yagumye ku mwanya wa 124 ku rutonde rw’Ishyirahamwe ry’Umupira w’Amaguru ku Isi (FIFA), rwasohotse kuri uyu wa Kane tariki ya 19 Ukuboza 2024.
Ikipe y’u Rwanda yari kuri uyu mwanya ku rutonde rwaherukaga gusohoka mu kwezi k’Ugushyingo 2024.
Ikipe y’Igihugu iheruka gukina muri uku kwezi k’Ugushyingo uyu mwaka mu gushaka itike y’Igikombe cya Afurika cya 2025, aho yatsinzwe na Libya igitego 1-0 itsinda Nigeria ibitego 2-1.
Urutonde rwashyizwe hanze n’Ishyirahamwe ry’Umupira w’Amaguru ku Isi (FIFA), kuri uyu wa 19 Ukuboza, rugaragaza ko u Rwanda ruri mu bihugu bitanyeganyeze kuko rwagumye ku mwanya wa 124 ndetse ntirwakunguka n’inota na rimwe rugumana amanota 1136.06.
Uru rutonde rushya rugaragaza nta mpinduka zahabayeho mu bihugu 10 bya mbere ku Isi ugereranyije n’ukwezi gushize k’Ugushyingo, urutonde ruyobowe na Argentine ikurikiwe n’u Bufaransa, Espagne, u Bwongereza, Brazil, Portugal, u Buholandi, u Bubiligi, u Butaliyani n’u Budage.
Liberia ni yo yungutse amanota menshi (34,47) n’imyanya myinshi iba iya 142 mu gihe Guinée Equatoriale yatakaje amanota 47,53, imanuka imyanya 10 iba iya 89.
Ibihugu 10 bya mbere muri Afurika ni Maroc (ya 14), Sénégal (17), Misiri (33), Algeria (37), Nigeria (44), Côte d’Ivoire (46), Cameroun (49), Mali (51), Tunisia (52) Afurika y’Epfo (57)
Mu bihugu bituranye n’u Rwanda, Repubulika Iharanira Demokarasi ya Congo ni iya 61, Uganda (88), Tanzania (106), kenya (108) n’u Burundi (139).
