Umutoza wa Manchester United, Roben Amorim akomeje kwandika amateka mabi nyuma yuko yari yitezweho kuyizahura gusa bikaba bikomeje kwanga aho iri gutsindwa umusubirizo.
Kuri uyu wa mbere ni bwo ikipe ya Manchester United yari yakiriye Newcastle United kuri Old Trafford mu mukino wo ku munsi wa 19 wa shampiyona y’icyiciro cya mbere mu Bwongereza.
Ni umukino warangiye Newcastle United itsinze ibitego 2 bya Alexander Isak ku munota wa 4 na Joelinton ku munota wa 19.
Gutsindwa uyu mukino byatumye umutoza wa Manchester United, Roben Amorim wahawe akazi yitezweho kuzahura iyi kipe akomeza kwandika amateka mabi.
Kugeza ubu nyuma y’imikino 19 Manchester United ifite amanota 22, aho ibintu byo kugira amanota angana gutya nyuma y’imikino ingana gutya byaherukaga mu mwaka w’imikino wo mu 1989/90 nabwo ikaba yari ifite amanota 22.
Kuva uyu mutoza yagera muri iyi kipe amaze gutoza imikino 11 akaba yaratsinzwemo imikino 6 aho gutsindwa imikino myinshi gutya ku mutoza mushya byaherukaga mu mwaka w’imikino wo 1931/32 ku mutoza witwaga Walter Crickmer aho we yatsinzwe imikino 7 mu mikino 11 ye ya mbere.
Kuva Roben Amorim yagera muri Manchester United, Southampton niyo kipe yonyine yo muri Premier League yatsinzwe imikino myinshi kuyirusha aho yo yatsinzwe imikino 7 .
Manchester United imaze gutsindwa imikino 3 yikurikiranya ku kibuga cyayo Old Trafford ibintu byaherukaga mu mwaka wa 1974.
