Musanze FC yahagaritse igihe kitazwi myugariro wayo, Shafiq Bakaki kubera imyitwarire idahwitse yamuranze mu mukino iyi kipe iheruka gutsindwamo na Vision FC ibitego 3-0.
Uyu mukino w’Umunsi wa 15 wa Shampiyona, wabereye kuri Kigali Pelé Stadium ku wa 30 Ukuboza 2024.
Kuri uyu wa 3 Mutarama 2025, ubuyobozi bwa Musanze FC bwamenyesheje myugariro w’Umunya-Uganda Shafiq Bakaki ko yahagaritswe “igihe kitazwi kubera imyitwarire idahwitse mu mukino wa Vision FC.”
Uyu mukinnyi ashinjwa gutsindisha ikipe ye muri uwo mukino, by’umwihariko mu kugira uruhare mu bitego bibiri binjijwe.
Ikosa rya mbere rivugwa ngo ni ukuba yarabanje kunanirwa guhagarika Rugangazi Prosper watsinze igitego cya kabiri, ndetse ubwo cyari kimaze kugeramo, uyu mukinnyi yazamuye ukuboko kw’ibumoso hagati ameze nk’uwishimira ko Vision FC itsinze.
Irindi kosa ni uburyo atigeze abasha gukina umupira waje mu kirere, yaretse ukidunda inyuma ye mbere y’uko uterwa mu izamu na Cyubahiro Idarusi watsinze igitego cya gatatu arobye umunyezamu.
Ubwo igice cya mbere cyari kirangiye, uyu mukinnyi yavuze ko arwaye, asaba gusimbuzwa ndetse ahita asubira i Musanze asize abandi bakiri ku mu mukino.
Bakaki ukina mu mutima w’ubwugarizi, yageze muri Musanze FC muri Mutarama 2023 ndetse yari yahawe amasezerano y’imyaka ibiri, bivuze ko ashobora gutandukana n’iyi kipe.
