Liverpool yanganyije na Manchester United ibitego 2-2 mu mukino w’Umunsi wa 20 wa Shampiyona y’u Bwongereza “Premier League” wabereye ku kibuga cya Liverpool, Anfield, ku Cyumweru, tariki 5 Mutarama 2025.
Uyu ni umukino watangiye mu bihe bigoye kuko abafana benshi b’aya makipe ndetse n’aba ruhago bibazaga niba uza gukinwa kubera ikirere kitari kimeze neza mu mujyi wa Liverpool.
Ikibuga cyaje gutunganywa umukino urakinwa, ndetse wari umukino ubereye ijisho ry’abawurebye kuko amakipe yombi yahanganaga bikomeye kurenza uko Liverpool yari yahawe amahirwe yo gutsinda biyoroheye.
Igice cya mbere cy’uyu mukino cyarangiye amakipe yombi anganya ubusa ku busa.
Mu cya kabiri ni bwo amakipe yakoze ibikomeye kuko Lisandro MartÃnez yafunguye amazamu ku munota wa 52, ariko ku wa 59 Cody Gakpo ahita acyishyura.
Yifashishije penaliti, Mohamed Salah yatsinze igitego cya kabiri cya Liverpool ku munota wa 70, gusa kiza kugomborwa na Amad Diallo wa Manchester United uri kuyifasha cyane aho rukomeye.
Umukino warangiye Liverpool inganyije na Manchester United ibitego 2-2, ikomeza kuyobora Premier League n’amanota 46, irusha amanota atandatu Arsenal ya kabiri.
Muri uyu mukino wabaye kuri uyu munsi, myugariro Trent Alexander-Arnold uri kugana ku mpera y’amasezerano ye, yagaragaje urwego ruri hasi kuko nta mupira n’umwe yigeze yambura umukinnyi wa Manchester United.
Liverpool ya mbere ifite umukino w’ikirarane izahuramo na Everton, na wo ukaba warasubitswe kubera ikirere cyari kimeze nabi muri uyu mujyi.
Ni mu gihe Manchester United yagize amanota 23 ku mwanya wa 13, izakurikizaho Arsenal muri FA Cup, tariki ya 12 Mutarama 2025.
