Zoran Milanovic wari Perezida wa Croatia kuva mu 2020, yongeye gutsinda amatora yo kuyobora iki gihugu muri manda ya kabiri, nyuma yo kwegukana hafi bitatu bya kane by’amajwi yavuye mu matora.
Minisitiri w’Intebe wa Croatia, Andrej Plenkovic niwe watangaje ibyavuye mu matora, yemeza ko Zoran Milanovic ariwe watorowe kuba Perezida ahigitse Dragan Primorac bari bahanganye.
Imibare yavuye mu matora igaragaza ko Zoran Milanovic yayatsinze dore ko yagize hafi bitatu bya kane by’amajwi, naho Dragan Primorac wo mu ishyaka riharanira ubumwe na Demokarasi (HDZ), yagize amajwi 25%.
Ibyavuye mu matora bikimara gutangazwa, Dragan Primorac yabyamaganiye kure, ndetse yanga gushimira Zoran Milanovic, ashimangira ko ntacyo azamarira Croatia muri manda ya kabiri atorewe kuyobora.
Perezida Zoran Milanovic watorewe manda ya kabiri, yashimiye abaturage bongeye kumugirira icyizere, anavuga ko azafatanya na Minisitiri w’Intebe mu gukemura ibibazo bihangayikishije iki gihugu.
Mbere yo kuba Perezida, Zoran Milanovic yahoze ari Minisitiri w’Intebe kuva mu 2011 kugeza 2016, anayobora ishyaka riharanira demokarasi (SDP) kuva 2007 kugeza 2016.
