Igipolisi cya Uganda cyaburijemo umugambi usa nk’ubwiyahuzi wo kwiba Banki ya Stanbic mu isoko rya Acacia Mall, kica abantu batandatu bakekwaho icyaha cyo kugerageza kwiba.
Igipolisi cya Uganda ku mugoroba wo kuri uyu wa Mbere, itariki 13 Mutarama 2025, cyari cyabanje gutangaza ko hishwe bane uwa gatanu wakomeretse bikomeye akaba yari afunzwe n’abapolisi mu bitaro byaho. Imibare nyuma ariko yaje kuba abantu 6 biciwe muri icyo gikorwa.
Iri tangazo ryongeyeho riti: “Aba bantu bari basanzwe ku rutonde rwa polisi kandi bakekwaho kuba baragize uruhare mu bujura.”
Iki gikorwa cyihuse cy’abapolisi kirashimwa ko ari intambwe ikomeye mu kurwanya ibyaha byateguwe i Kampala nk’uko bitangazwa na Chimpreports.
Ababyiboneye bavuga ko abapolisi bari benshi aho bagose ako gace kandi banarinda umutekano w’abakiriya b’ubucuruzi.
Nta muturage wigeze agirirwa nabi muri iki gikorwa.
Polisi yavuze ko andi makuru agezweho, arimo umwirondoro w’abakekwaho icyaha ndetse n’ibisobanuro by’ibikorwa byabo bakekaga mbere, bizatangazwa nyuma mu gihe iperereza rigikomeje.
Mu Kuboza 2024, Polisi ya Uganda yatangaje ko hafashwe “abantu barenga 200 mu gikorwa cya polisi cyo guhashya udutsiko two mu mijyi tugira uruhare mu bujura no kugaba ibitero ku bantu bitwaje imihoro, imitarimba n’inkoni.”
