Nsanzimfura Keddy wavugwaga muri AS Kigali yasinyiye Gorilla FC amasezerano y’amezi atandatu.
Uyu musore ukina mu kibuga hagati, mu ntangiriro z’uyu mwaka w’imikino yari yerekanywe muri Kiyovu Sports ariko birangira atayikiniye kubera ibihano byo kutagura abakinnyi iyo kipe yafatiwe n’Ishyirahamwe rya Ruhago ku Isi (FIFA).
Mbere yo gusinyira Gorilla FC uyu mukinnyi yavugwaga muri AS Kigali ndetse aherutse kugaragara akora imyitozo muri iyi kipe, nubwo batumvikanye ku masezerano aho uyu mukinnyi yifuzaga amezi atandatu iyo kipe ntibyemere.
Mu gitondo cyo kuri uyu wa Gatatu, Keddy yakoranye imyitozo na bagenzi be muri Gorilla FC ku kibuga cya IPRC Kicukiro.
Mu mpeshyi ya 2024, Nsanzimfura ni bwo yatandukanye na Al-Qanah FC yo mu cyiciro cya kabiri mu Misiri yakiniraga.
Uyu mukinnyi kandi yanyuze muri Kiyovu Sports yazamukiyemo ndetse na APR FC.
Keddy abaye umukinnyi wa gatatu Gorilla FC isinyishije muri uku kwezi kwa Mutarama nyuma ya Rutahizamu w’Umurundi Landry Ndikumana n’Umunya Ghana Sally.
