Umunyamerika James Jimmy Donaldson uzwi cyane ku rubuga nkoranyambaga rwa YouTube nka MrBeast, yatangaje ko yifuza kugura urubuga rwa TikTok.
MrBeast yatangaje aya magambo nyuma y’aho Urukiko rw’Ikirenga rwa Leta Zunze Ubumwe za Amerika rwemeje ko TikTok igomba kuva mu maboko ya Leta y’u Bushinwa bitarenze tariki ya 19 Mutarama 2025, bitaba ibyo igahagarikwa muri Amerika.
MrBeast abinyujije ku rubuga rwa X, kuri uyu wa 14 Mutarama 2025 yavuze ko azagura uru rubuga kugira ngo rutazahagarikwa muri Amerika, ati “Ntacyo, nzagura TikTok kugira ngo idahagarikwa.”
Byahwihwiswaga ko Leta y’u Bushinwa ifite ikigo ByteDance kigenzura TikTok ndetse byavuzwe ko Elon Musk yaba azarugura ariko arabihakana.
Ku butegetsi bwa Perezida Biden, TikTok yashyizwe mu majwi ko yifashishwa na Leta y’u Bushinwa mu gutata amakuru muri Amerika, ariko TikTok yakomeje guhakana ibi birego.
Donald Trump we avuga ko iki bibazo gikwiye gushakirwa igisubizo gishingiye kuri politiki, kitari guhagarika burundu uru rubuga. Yasabye Urukiko gusubika umwanzuro warwo kugeza asubiye mu biro by’Umukuru w’Igihugu kugira ngo ashake icyo gisubizo.
Gusa haribazwa niba ibyakozwe na MrBeast ari urwenya cyangwa se akaba yari akomeje, cyane TikTok ibarirwa agaciro ka miliyari 100$, amafaranga menshi kuri MrBeast.
